Kani pat jasan ninghkap ai asuya pyitusit hte KIA gasat poi byin

Kambaiti BGF

Kambaiti ginra, kani pat jasan lam ninghkap ai Myen asuya pyitusit hte Wunpawng Mungdan Shanglawt Hpyendap KIA Dung 3 lapran, March 22 mani aten hkying hkum mi daram gap hkat wa sai re.


KIA Dung 3 daju Ngwa Le hte n tsan ai Htang Maw Hkang makau e tinang KIA kani pat jasan hpyen hpung hte pyitusit lapran gap ai lam byin ai hpe KIO/KIA ginjaw na lit nga Du Kaba Nhpang Naw Bu, KNG Jinghpaw Shiga Dap de tsun shateng ai.

“Teng na re. Anhte atsawm hkrak re shiga gaw n lu shi tim, gasat poi byin ai gaw teng na re” nga Du kaba Naw Bu tsun ai.

Uhpung lahkawng dap lapran, Kambaiti Lam kaba a sinna dingda Htang Maw Hkang mare group yin hta hkying hkum mi daram gap hkat ai lam hpe ndai shiga ‘Myu Tsaw Kasa’ facebook ntsa mara ai wa mung tsun shateng ai re.

Ndai bat pru kaw nna, KIO a labu pan kani pat jasan masing hpe kani sun eka hkying kaba hkai ai Myen asuya Jarit Sin Dap (BGF) hte pyitusit uphkang ai Kambaiti, Sadung ginra ni hta, hpang wa sai lam Du Kaba Naw Bu ya na zawn matut tsun ai.

“Anhte KIO/KIA hku na Pat Jasan magam bungli galaw ai ngu gaw policy dingyang nga ai. Raitim tatut hta e anhte a masawp dep ai shara kaw e nga ai hpe mu mada ai a majaw ndai laman galaw hpang ai rai na re”

Lai wa sai February 25 hta, nawku hpung woi awn ai mungshawa Pat Jasan hpung ni Kambaiti ginra kani hkyen shamyit na lung wa ai hpe, lam lapran kani sun madu ni, asuya BGF hte pyitusit ni pawng nna sinat lankak bawm ni hte laja lana shingdang gasat ai majaw, masing jahkring kau ra mat ai re.

Dai hpang, ya kani mangai ten, KIA Dapdung 3 hpyen hpung hku nna Kambaiti ginra e pat jasan masing galaw wa ai re.

Posted in: