KIA Dapba 6 hpaw ai lam, ginra masha Miwa ni hpe sanglang dan

Feb 26 KIA Dapba 6 tara shang hpaw poi, Mai Ja Yang

Lahta Sam mung e hpa majaw KIA Dapba (6) kahtap hpaw ra ai lam hte seng nna ginra buga masha, grau nna Miwa ni hpe alak mi hkrum shaga sanglang dan ai lamang hpe KIA Dapba (4) Daju, Mai Ja Yang e dai hpawt galaw sai re.

KIO Dingda Ginwang Ginjaw Tingnyang Up Dukaba Lahpai Zau Raw woi awn nna, Dapba (4) salang ni, Dapba (6) salang ni shanglawm let Dapba (6) hpaw ai lam hte Wunpawng Mungdan Shanglawt Hpung/Hpyendap (KIO/ KIA) a labau hpe mung, hpunau Miwa ni hpe sanglang dan ai re.

Ndai zuphpawng de KIA Dapba (6) ginra, shawng de Myen mung kummyunit pati (Ba-Ka-Pa) ginra--- Mungbaw, Munggu, Hpawng Seng hkan na Miwa amyusha 50 jan sa du ai lam, Dapba (6) salang ni KNG Jinghpaw Shiga Dap de tsun ai.

Dapba (6) kata, ya ten Dapdung 2, 36, 37 hte 38 ni shanglawm ai rai nna, matut nna hpaw jat wa na re lam hpe Dapba 6 salang ni hku nna chye lu ai.

Dapba n’nan hpaw ai hta, mani Munggu grupyin e Myen asuya dap hte gap hkat ai lam ni gaw, jahpawt daw Loi Wing e kalang hte shana daw Hu Pung e kalang byin wa sai re.

Ndai ten, Myen asuya hpyen n-gun jat ai hku nna, mana kaw nna Sakhkung Hka a sinpraw hkran Kokang ginra de na hpyen n-gun 200 jan gaw Hpawng Seng de rap shang nga dingyang re lam, Dapba (6) salang ni tsun ai re.

UPWC, Myen asuya a Munghpawm Simsa Lam Hkrang Shapraw Komiti hku nna gaw KIA Dapba (6) hpaw jat ai lam ntsa ja ja ninghkap ai lam Feb. 29 ndau hta tsun tawn ai.

Posted in: