Slg. Zahkung Ting Ying a tara shawk ai lam PJS ningbaw ni n chye

ၤFeb 26, Myitkyina mungshawa n-gun madun poi

Slg. Zahkung Ting Ying dinghku masha ni kaw nna mungshawa Pat Jasan hpung hpe mani na nhtoi hte tara shawk dat ai lam shiga le wa ai ntsa PJS ningbaw ni n chye ai lam tsun ai.

“February 25 ya shana asuya jarit sin dap BGF a ninghpum salang rai nga ai Slg. Zahkung Ting Ying a nta hte rung shawng kaw n-gun madun ai PJS hpung ni hpe akyu jahten ai, sari jahpoi ai arawn alai, tara kanu 6 hte tara shawk dat ai lam” RFA Myen shiga hta mani March 7 hta kada ai re.

Dai lam hte seng nna, Waimaw Ginra Pat Jasan Komiti ningbaw sara Hpau La gaw Salang Zahkung Ting Ying a nta masha ni tara shawk da ai hpe n chye ai rai nna, dai n-gun madun lamang e mung PJS hpung ni n lawm ai lam ya na zawn tsun ai.

“Dai hte seng na gaw n na shi ai. Anhte hpe hpa mung n tsun wa ai. Langai mi gaw nga ai dai Zahkung Ting Ying a nta kaw lungdin ni hte sa kabai ai gaw anhte Pat Jasan hpung ni n re. Mung shawa ni she rai na re. Dai kaw n-gun madun na matu woi awn ai lam mung n nga ai. Woi awn na hkum tsun, anhte masha ni hpe tsirung de sa na anhte kyin taw nga ai.”

PJS hpung ni gaw bat mi tup pat da hkrum ai Waimaw, Washawng gate kaw nna February 23 hta asuya pyada hte wan sat dap ni a shimlam hte Kambaiti kani yi hkyen shamyit masing hte lung wa ai rai nna, February 25 ya shani Kambaiti ginra asuya jarit sindap BGF, n’gawn hpyen hpung hte kani yi madu ni a sinat bawm ni hte hkap gasat ai hpe hkrum wa sai re.

Bai nna, Jinghpaw mungdaw pyada dap rung daju kaw nna mung PJS ningbaw nkau hpe gasat hkrum ai hte seng nna mabyin hpe dinghkrai shaga san jep ai lam hpe March praw 2 hta galaw lai wa sai.

Laknak kata PJS hpung gasat hkrum ai majaw Myitkyina mungshawa hkying lahkawng jan gaw February 25 ya shana hte 26 ya shani Myitkyina e lam hkawm ninghkap n-gun madun ai lamang ni galaw wa sai re.

Posted in: