23 ning hpring 8.8.88 masat sumla madun poi Bangkok e galaw

Myen dakkasu jawngma ni woi awn ai, Myen mung democracy a matu ninghkap n-gun madun ai, 8.8.88 mabyin snr 1988 ning August shata 8 ya mabyin a 23 ning hpring masat masa sumla madun ai lam hpe, Htai mungdan mare daju Bangkok kaw galaw wa sai re.

Sumla madun ai lamang hpe, Bangkok mare na Foreign
Correspondents Club of Thailand (FCCT) shara kaw shana hkying 7 kaw na galaw ai hta, Myen mung kaw byin nga ai, shinggyim ahkaw ahkang tawt lai ai lam ni hpe, Mungkan Wunpawng Hpung (UN) kawn jep sagawn hpung (Commission of Inquiry) hpaw nna, jep sagawn na matu, ASEAN malawm mungdan ni kawn madi shadaw wa na yaw shada let ndai lamang hpe galaw ai re lam, lamang hpe wo awn galaw ai, SYCB (Students and Youth Congress of Burma) a Ninggawn Amumadu Shadang Naw San tsun ai.

August 8 ya gaw, ASEAN (The Association of Southeast Asian Nations) a 44 ning ladu hkrum sai aten mung rai nna, sumla ni hpe yu nna, ASEAN malawm mungdan ni kawn, Myen mung kaw, shinggyim ahkaw ahkaw tawt lai ai lam ni hpe jep sagawn na matu, madi shadaw wa na hpe myit mada ai lam, Shadang Naw San tsun ai.

Ndai lamang hpe Htai daju Myen mung democracy uhpung uhpawng ni rai nga ai--- Forum for Democracy in Burma (FDB), SYCB, Nationalities Youth Forum (NYF) hte Assistance Association for Political Prisoners (AAPP-B) ni jawm woi galaw ai lam re.

Matsat 4 mabyin a sumla ni hte rau, 2007 ning na Bukda hpungkyi ni woi awn ai, ninghkap n-gun madun ai lam ni, Depeyin masha sat sharu ai manghkang ni hte ya byin nga ai, hpang jahtum na mabyin ni hte seng ai sumla ni hpe madun mat wa ai rai nga ai.

“Maning na ralata poi ngut ai hpang Karen, Karenni, Sam hte Jinghpaw mungdaw ni kaw byin wa ai, mung shawa ni zingri hkrum ai sumla ni hpe madun mat sai lam,” Naw San tsun ai.

Bai nna, Myen mung kata kaw na, mung masa bawng masha ni hte seng nna mung, sanglang dan ai lam ni galaw mat wa ai re lam shi tsun ai.

“Ya ten Myen mung kaw mung masa bawng masha 1994 nga ai, shahte tsi mawan n lu ai lam ni, malu masha yak ai lam ni, hkyuk htawng kata na masa, dat ya ai lam mung n nga ai lam ni hte seng nna, tsun mat sai lam,” shi matut tsun ai.

Myen mung kata byin nga ai, shinggyim ahkaw ahkang tawt lai ai lam ni hte seng nna, ASEAN malawm mungdan ni kawn madi shadaw nna, jep sagawn ai lam ni byin pru wa na matu, lamang galaw ai ni kawn myit mada da ai lam chye lu ai.

Posted in: SHIGA