Wednesday, August 24, 2011

Myen asuya gaw Panglong mung masa n hkap la

KIO Ginrun Ninggawn Amumadu-2 Salang Kaba Lar Nan.
 Hpyendap shingnan Myen ginjaw asuya gaw 1947 Panglong Ga Shaka hta ningpawt nna mung masa bawngban na n hkap la sai lam chye lu ai.

Hpyendap ara 2008 Gaw Da ai Tara Kanu hte maren sha simsa lam bawngban sa wa na re lam hpe Myen asuya gaw Laiza daju KIO de lai wa sai bat jahtum de shana dat ai lam, KIO salang ni hpe lakap let chye lu ai.

Ndai lam ntsa KIO ginjaw mung “2008 Gaw Da ai Tara hpe n hkap la ai lam, 1947 Panglong Ga Shaka masa hku sha mung masa bawngban na re lam” hpe August 23, Bat Langai Ya shani bai htang shana dat sai lam, ginjaw Laiza na KIO salang ni tsun ai.

16-ning jan Myen hte Shanglawt a simsa lam gaw June 9 KIA hpe Manmaw ginwang N’Mawk , Sang Gang e Myen hpyen ni “Ta Hkaw Hka wanjak shimlam la ai gabaw” hte htim gap ai shani kaw nna hten mat sai re.

De a shawng, aten galu simsa ai ladaw hta mung Myen gaw KIO hte kaga simsa lam hpung ni yawng hte mung masa bawngban hparan ai lam n galaw ai. Raitim, 2008 Gaw Da ai Tara hpe tinang ra ai hku ka jahkrat la ngut ai hpang gaw, madu uphkang ahkaw ahkang hpyi ai rawt malan hpung ni hpe Myen hpyendap npu taw ai Jarit Sin Dap (Border Guard Force) snr N’gawn Hpyen de hkrang galai na dip n-gun jaw sai.

KIO Ginrun Ninggawn Amumadu-2 Salang Kaba Lar Nan gaw, “Myen asuya ni hte shawng de dinghkrai ladat hte grai jahta yu sai, raitim n awngdang ai majaw, ya gaw Panglong myit jasat hta ningpawt nna amyusha hpyen masa mung masa daphpawm, UNFC hku mahtang jahta sana re,” nga ai.

Kade a npu mung n taw ai Jinghpaw, Sam hte Hkang rudi amyusha ningbaw ni gaw Myen ningbaw Bochyuk Awng San hte Panglong Ga Sadi galaw nna Munghpawm Myen Mungdan hpe gaw de wa ai re.

Panglong Ga Sadi hte maren Munghpawm Myen Mungdan gaw 1948 ning hta Inglik mung maden wa lata kaw nna shanglawt lu wa sai. Raitim, shanglawt lu ten kaw nna ya ten du hkra mungdan a daru magam hpe Myen amyusha ni sha manat tawn ai re.

Myen ni woi awn ai mungdan asuya langai hpang langai gaw, madu uphkang ahkaw ahkang hte jet ai munghpawm hpyi ai rudi amyusha rawt malan hpung ni hte man hkrum mung masa bawngban hparan na n hkap la sha, gasat shamyit na sha myit mang galaw nga dingyang re.

August 18 ya shani hta Myen ginjaw asuya gaw rawt malan hpung ni de simsa lam bawngban na ga saw ndau dat sai. Raitim, dai masing gaw uhpung shagu hte san san bawngban jahta na hte, 2008 Gaw Da ai Tara hta ningpawt ai majaw, KIO hte UNFC malawm ni hkap la ai lam n nga ai.

0 comments:

Post a Comment