 |
| August 2-3, Col. Tan Awng woi awn ai Myen dat kasa hte Brig-Gen Gun Maw woi awn ai KIO dat kasa ni KIO Lajayang Kyit Hkai Rung e gap hkap jahkring na lam gabaw hta bawngban nga yang. |
KIO/KIA hku nna ndai hku gap hkat jahkring simsa lam la na hkrum jahta ai gaw mung masa ginsup ai hku re nga tsun nga ma ai. Raitim ginsup n shut na gaw ahkyak nga ai.
Ya sha ya sha sa nna KIO/KIA hpe gap hkrat jahkring na matu hpyi lajin nga ai Myen dap ni a kasa ni gaw Myen dap ginjaw Naypyidaw asuya kawn shangun ai re ngu hpe kade ram pahkam hkam lu na kun? Hpa majaw nga yang Ginjaw Naypyidaw gaw ya du hkra Mungdaw asuya ni hpe hpa ahkaw ahkang n jaw shi ai shiga na lu ai, ndai lam hpe Chin National Party (CNP) na Slg. Kyaw Nyein ni hte kaga party ningbaw ni mung tsun garu nga ma ai.
Mungdaw salang ni hta hpa ahkaw ahkang n nga ai wa Mungdaw dat kasa re nga ai Du Tan Awng, Hkyet Hting Nan, Tsumhpawng Sin Wa zawn re ni kawn jahkrup ai hpe KIO/KIA gaw kam nna gap hkat jahkrup ai lam mahkra hpe hkapla yang shut mai nga ai. Rai nna KIO/KIA gaw ya bai simsa lam la kau nna hpa baw matut galaw na?
Myen dap ni gaw amyu bawsang ni hpe Garan Nna Up (divide-and-rule) ladat hpe lang nna shakri nga ai, ya gap hkat jahkring simsa lam sa jahta dat jang KIO/KIA kata nkau ni gaw “matut gap na, nkau ni gaw gap hkat jahkring simsa lam la na”, ndai zawn n ru n ra byin shangun nga ai. Tinang kata myit n hkrum jang she Myen ni aloi sha up sha lu na rai nga ai, hpyen wa ra ai gaw dai rai nga ai.
Myen dap ni gaw KIO/KIA hte bawng yu nna jahkrup lu jang gaw amyat re, n lu tim asum n re.
KIO/KIA hku nna Myen hte gap hkat jahkring simsa lam la na hpe hkap la sai lam shiga dap de Du Kaba Gun Maw shana wa sai, ya Myen hte simsa lam la na myit hkrum wa ai gaw, “Mung shawa ni grai jamjau wa ai majaw” ngu ai gabaw npu e sawn nga ma ai. Mung shawa ni a myit hta hpa baw rawng ai hpe July shata 12 ya shani na Laiza zuphpawng hta azin ayang tsun dan lai wa sai re. Jamjau tim Myen a mayam prat kawn na lawt hkra shakut na matu naw kasat ga nga tang madun wa sai, jamjau tim jamjau u ga hkam sharang nna naw shakut na lam htawng madun wa sai.
KIO/KIA hku nna J.P mung shawa a ga madat na i, Myen dap a ga madat na i?
Gap hkat jahkring ngut jang Myen hte mung masa bawngban na hte prat tup simsa lam galaw na tsun nga sai. Myen gaw KIO/KIA hpe galoi wa mung masa jahta a ni?
Shawngdaw de gap hkat jahkring simsa lam la ai majaw tat sum kau ai lam ni kade ram law sai hpe gaw n dinglik yu sai kun? Simsa lam la ai laman KIA hpyenla law law sat hkrum mat sai, ramma ni law law kani ya tai ra mat ai, Jinghpaw htinggaw law law dumbri dumbra byin mat ai, laban launa law law hpaga hkrat mat ai, anhte simsa lam la ai majaw hpabaw amyat lu a ni? Myit yu ga.
3 comments:
N-dai lahta e ka da ai Ningmu laika hpe grai madi shadaw n-ngai law.
Myen hpyen wa a GA galoi wa jaw a-ta ?? Galoi wa Ga sadi Dung a-ta ?? ya gaw an-hte Myu sha ni hpe Myen Hpyen wa a Zingri Zingrat, Roi Rip sha ai kaw na woi lawt sana re ngu na Myu Tsawra Share Shagan KIO/KIA hpe grai kam ga ai re... YA Gaw, Lwi Yawng mat sana kun i ?? An-hte Maigan nga Myu sha ni sha n-re, Kanu Mungdan e nga ai Myu sha ni hte a-sak ap nawng let Myu hte Mungdan a matu magam gun nga ai ni law malawng mung matut manoi Gap hkat n-na Awng Padang du hkra galaw sa wa na hpe Grai RA SHARAWNG nga ma ai re. KIO/KIA Ningbaw Ningla Salang ni e,,, Grai myit yu let she, Karai Kasang hpe kam let she naw woi awn marit law,,,, Awng Padang n-lu shi yang hkring mat sa na kun ?? Grai Yawn la n-ngai law....
Bandung gaw kri zawn rainga na raiyang anhte a hkrunlam gaw kaja wa tsawdep awngdang wa luna re..
Myen hpyen ni tsun ai teng /nteng gaw labau a mahkrum madup, tatut hpe yu na daw dan ra ai, teng sha ga sadi hte maren galaw saga nga nrai yang jahkring hkring hkrum ai gaw, tinang maga sum wa na lam re, hkrum ai law magang hpyen wa gaw manaw kya ai lam ni, gawng kya wa ai lam ni hpe kyawk la lu magang sha re, dai majaw lachyum npru ai, ten ma ai, myu sha shana a lapran e ntsen hkat ai lam ni pru wa lu ai. mung masa galaw ai hta sari yawm wa ai, ma kasup hkat ai hku mu wa ai, YA MYIT HKRUM SAI NGA SHIGA GAMAWNG AI MAJAW mung masha a matu mungmasa nre sha hpung 2 maga a akyu amyat jahaw la lu na rai sam ai nga tsun nga ma ai hpe pi na lu sai...
Post a Comment