Shada bai hkrum hkat na Myen-KIO jahkrup nga

Gap hkat jahkring simsa lam hte seng nna, 3 lang bai shada bawngban hkat lu na matu, ya ten Myen asuya hte KIO lit nga salang ni lapran bawngban nga dingyang re lam chye lu ai.



Jahkrup ai lam awngdang yang du na bat hkan e uhpung lahkawng na datkasa ni lapran bai hkrum hkat na masa nga ai lam KIO datkasa hpung shiga lawk tsun ai.

Simsa lam hte seng nna uhpung lahkawng datkasa ni Lajayang KIO Laisin rung e August 2-3 hta lahkawng lang ngu na hkrum hkat sai hpang, shada matut mahkai lam hpe laika, telephone ni hte htinglet nga ai re.

August 10, KIO/KIA Share Shagan Nhtoi hta, Jinghpaw mungdaw asuya, Myen jahkrup jahkrum ningbaw Col. Tan Awng gaw Laiza de laika ka nna simsa lam myit hkrum lakmat htu lu hkra lawan galaw na matu lajin dat sai re.

Gap hkat jahkring na matu KIO hkap la ai raitim, myit hkrum lakmat htu lu madang de du na matu gaw aten galu hte kata lam bawngban jahkrup na law law naw nga ai lam, KIO ginrun Ninggawn Amumadu-2 Salang Kaba Lar Nan tsun ai.

Ndai ten, August 12, mani bat Manga ya shani hta Myen asuya Shi Htawn Shada Hkringmang Dap, hkring U Kyaw Hsan gaw Naypyidaw mungdaw mare daju e shi laika sanglang ai lamang galaw sai.

Lamang hta, Hkringmang Kayaw Hsan gaw KIO/KIA hpe “1994 simsa lam ga sadi hpe n hkan sa lale ai sha n ga, ya mung, asuya a htum hkra shagrit shanem let jet ai simsa lam galaw na saw shaga ai lam hpe n hkap la hkraw ai” nga nna, dinglung dat sai re.

Posted in: SHIGA