Saturday, August 20, 2011

Myen asuya a simsa lam jahta na saw shaga ai lam, KIO n hkap la


Mungdan ting madang mung masa bawngban na n re ai majaw, Myen asuya n’nan a simsa lam bawngban na saw shaga ai August 18 ndau (1/2011) hpe KIO n hkap la ai lam tsun wa sai re.



“Dai kaw mung masa bawngban na lam n rawng ai. Simsa lam sha nga taw nga ai. Shanhte Du-tawun-ahye-tungpa kata kaw madaw pyi-twin-pani-pet-hka hpe hparan na ngu ai lachyum rai taw nga ai. Du-tawun-ahye-tungpa gaw 2008 mungdan gawda tara hpe madi madun ai lam re. Dai 2008 mungdan gawda tara npu hta gaw, anhte rawt malan uhpung uhpawng ni hku nna gaw, bawngban jahkrup na lam hpa n nga ai hku re” nga nna KIO ginrun Ninggawn Amumadu-2 Salang kaba Lar Nan tsun wa sai re.

Ndau hte maren Myen asuya hku nna laknak hpai amyu bawsang hpung ni hte simsa lam jahta ai hta, mungdaw/ginwang asuya tsang kawn ginjaw tsang du hkra uhpung langai hkrai hte san san bawngban na lam re.

Raitim Salang kaba Lar Nan gaw, “Wuhpung langai hkrai bawngban jahkrup ai lam hpe gaw moi M.S.L prat hta mung grai galaw yu sai. Na-Wa-Ta prat hta mung galaw yu sai. Ndai Na-A-Hp prat mung galaw yu sai”, nga tsun wa ai.

Jinghpaw Wunpawng amyusha ni a shanglawt ahkaw ahkang a matu 1961 kaw nna rawt malan hpang wa ai KIO gaw, Taw-lan-ye kongsi asuya, M.S.L asuya, Na-Wa-Ta asuya, Na-A-Hpa asuya ni hte KIO wuhpung langai hkrai hku nna, lang hte lang bawngban sa wa tim, mungmasa mahtai n lum tam shi ai re.

Dai hte maren, amyu bawsang ni lapran rap ra ai lam n nga ai 1947 mungdan gawda tara hpe mungdan ting bawngban jahkrup ai lam nga ai majaw, Myen mung shanglawt lu ai 1948 ning kawn laknak lang rawt malan ai lam ni byin wa sai re.

2008 mungdan gawda tara npu na asuya nnan hte mungmasa bawngban sa wa na rai yang, KIO dinghkrai n bawng ai sha, UNFC (United Nationalities Federal Council) hku nna she mungmasa bawngban sa wa na masing hpe Jinghpaw mungdaw asuya datkasa ni hpe, asan sha tsun dat sai lam, Salang kaba Lar Nan tsun wa sai re.

Jinghpaw, Karen, Karenni, Hkang, Mon, Sam, Wa, Lahu, Palawng, Pa-uk my bawsang laknak lang rawt malan hpung ni lawm ai UNFC hpe, “tawng-chyan-tu” ngu nna, August (12) ya Nyepyidaw shi sawk salang ai poi hta, Myen ginjaw asuya shihtawn hkringmang Slg. Kyaw San tsun wa sai re.

0 comments:

Post a Comment