KIA Dapdung 9 hpe Myen dap ni zing kau

Lahta Sam mung, KIA laksan Dapba 4 npu Major Mahkaw La Ring woi awn ai Daknai-daju KIA Dapdung 9 hpe Sept. 25, mani Laban Ya shana kaw nna Myen asuya dap ni zing kau sai re.

Bat Kru Ya shani kaw nna Myen hpyen ni gaw n-gun 1,000 mi jan hte KIA Dapba 4 ginjaw Loikang hpe shing grup tawn ai KIA Dapdung 2, 8 hte 9 ginra de htim gasat wa sai re.

Lahkawng ya matut manoi Myen dap gaw 120 mm amyawk gap bun ai majaw, Dapdung kaw na KIA ni yen kau ya ai re lam, Dung 9 shiga lawk tsun ai.

Lahkawng ya laja lana majan hta, Myen de na hkrat sum masha law nna, hkala hkrum ai 100 daram re lam, Dapba 4 hpyendu langai tsun ai.

KIA maga, Myen a amyawk hte lahkawng hkrat ai hta, langai gaw lat du re lam, seng ang ai KIA hpyendu langai tsun ai.

Laban shani hta sha, Namtu-daju KIA Dung 8 ginra, Mandung ginra Namhai makau kaw mung gasat poi kaba byin ai hta, Myen de na si hkrung si htan hte hkala nba law ai majaw, jahtum e htingnut mat ai lam, Dung 8 shiga tsun ai.

Bai nna, KIA maga gaw marai 2 hkrat sum mat ai lam, Dung 8 shiga lawk hku matut chye lu ai.

Lai wa sai lahkawng ya kaw nna Magwi daju Dapnawng Masat 88 hte Mikhtila daju Dapnawng Masat 99 lawm ai hpyen n-gun kaba gaw KIA hpyen hpung ni hte Dapba 4 grupyin kaw gasat poi kaba byin hpang wa ai re.

Ya matut nna mung, Lahta Sam mung hta, Myen hte KIA gasat poi ni grau grau sawng wa na masa nga ai lam, Dapba 4 hpyendu ni tsun ai.

Posted in: SHIGA