KIA Dapba 4 ginra na mung masha tsa lam, majan koi yen nga

Sept. 24, lai wa sai bat kru ya shani kaw nna Myen asuya hpyen n-gun kaba gaw Lahta Sam mung KIA Dapba 4 hpe htim gasat dat ai majaw, mung masha tsa lam majan koi yen nga sai re.

Ya ten, Kutkai hte Muse ginwang na yawm dik mare 6 na mung masha ni gaw tinang hte ni nna, hpyen majan sim ai mare buga ni hte Miwa ga jarit ni de hprawng yen nga dingyang re lam, tsinyam yu maram ai ni tsun ai.

KIA Dung 9 ginra Daknai, Nawng Ing hte Mungli mare ni, bai nna Htanhpa Bum hte Banggai Bum hkan na buga masha ni gaw, ya ten Nam-um, Nampaka hte Muse mare kaba ni de hprawng yen nga ai lam chye lu ai.

Bai nna Tamung Nye hte ni ai shara hta nga ai KIA Dung 2 ginra na buga masha ni rai yang, Tamung Nye-Kutkai lam de hprawng yeng nga ai lam matut chye lu ai.

Sept. 26, bat Langai Ya jahpawt hta mung, Dima hte Nawng Ing mare na buga masha 40 daram gaw Miwa ga de hprawng shingbyi na matu Pangsai kaw du ai shaloi, Myen balik ni pat shingdang wa ai lam chye lu ai.  Shanhte hpe Panglai Jinghpaw Hkalup Hpung Nawku jawngwang kaw sha shingbyi na matu balik ni sa matsun wa sai re.

Hpyen yen masha langai tsun wa ai gaw, “Hpa majaw nga yang mare kata kaw nga nan n mai mat sai majaw re. Myen hpyen ni gap dat ai pala, myawk si ni gaw mare kata hkan mung hkrat bun ai. Nkau mi hkala nba hkrum wa sai re. Myen hpyen ni shang zingri wa na hpe mung grai tsang ga ai.  Dai majaw shim ai shara de mai byin ai hku hprawng yen wa sai re” nga ai.

Bat langai ya du hkra, hpyen yen tsin yam masha ni (Internally Displaced Persons) hpe kadai gara uhpung uhpawng ni mung lakawn lanawn garum madi shadaw ai lam ni n galaw shi ai hpe chye lu ai.

Myen hpyendap gaw Dapba 4 hpe hpyen man 4, 5 hku htu gasat taw nga ai hta, KIA Dung 9 daju Dak-let Bum hpe Sept. 25, Laban ya shana de gan zing da lu sai re.

Raitim majan zim mat na sat lawat n mu ai sha, hpyen yen masha ni grau grau law wa na re lam sagawn chye lu ai.

Posted in: SHIGA