Namsan Pa gasat poi hta Myen hpyenla 40 jan hkrat

Jinghpaw mungdaw a sinpraw hkran Namsan Pa hta Myen asuya dap hte KIA ni, masum ya matut manoi gasat poi byin nga ai hta Myen maga 40 jan hkrat sum nga sai lam, shawnglam majan shiga lawk tsun ai.

Myen dap ni dung ai KIA ginjaw dingsa Nahpaw Bum de lung wa ai lam Namsan Pa bum ladaw hta uhpung lahkawng hpyen hpung ni, Sept. 14, bat hpang Masum Ya shani kaw nna shani shana gasat poi byin nga ai re.

Gara kanu dap na hpyenla ni hkrat sum ai lam n chye lu tim, dai kaw hpyen hpung hkawm nga ai Myen dap ni gaw Myitkyina-daju Hk.L.Y masat 37 hte Numlang-daju Hk.M.Y masat 438 re lam, KIA shiga lawk tsun ai.

Ndai Myen dap lahkawng na hpyen n-gun 200 jan gaw tinang Nahpaw Bum dap kaw nna Namsan Pa de yu wa ai shaloi, KIA ginjaw makawp Dapba 5 hpyen hpung ni hte gasat gala lam byin wa ai re lam, shawnglam ginra buga masha ni tsun ai.

Bai nna, Sept. 15, mani bat Mali Ya shani hta mung N’Mawk ninghtawn Ta Hkaw Hka wanjak sa lam, Nam Hpak Hka kahtawng kaw Myen hte KIA ni gap hkat wa sai re.

Ndai gasat gala hta Myen hpyenla langai hkrat nna MA-2 Myen sinat lau langai hte rau, kaga hpyen rai ni mung zing la lu ai lam, KIA shiga lawk tsun ai.

KIA gaw UWSA a hpang Myen mung kata amyu bawsang rawt malan hpung ni hta n-gun ja dik rai nna, ya ten, amyusha rawt malan a hpyen masa mung masa daphpawm UNFU a ningbaw mung re.

KIA gaw lai wa sai June shata kaw nna tinang hta n-gun kaba ai Myen dap hpe jaugawng ladat hte ninghkap gasat nga ai rai nga ai.

KIA gaw Myen mung ting madang simsa lam la nna, munghpawm gawde ai ningpawt 1947 Panglong Ga Shaka hpe ningpawt nna Mung masa jahta na matu ginjaw Myen asuya de tang madun ai raitim, ya ten du hkra hkap la ai lam n nga ai.

Posted in: SHIGA