Lahta Sam mung Hu Hpyet kaw Myen-KIA gap hkat

Lahta Sam mung Mandalay-Muse Miwa ga jarit hpaga lam a lapai maga, Hu Hpyet kaw Myen asuya dap hte KIA lapran aten galu gap hkat ai lam, dai ni byin wa sai re.

Loikang-daju KIA Dapba 4 shiga lawk tsun ai hta, Tamonye na lung wa ai Myen hpyen hpung lahkawng hte, KIA Dapdung 9 a kung-1 lapran, Hu Hpyet makau kaw jahpawt hkying 11 kaw nna gap hkat ai re, nga ai.

Yawm dik hkying hkum mi jan shada gap kapaw hkat ai mabyin hta uhpung lahkawng maga, si hkala hkrum ai masha nga n nga, n chye lu shi ai.

Nde a shawng lahkawng ya hta, lam maw kaba makau Nam Um mare kaw nna sinpraw dingda maga deng 8 tsan ai, Dima mare makau Myen asuya a Shwi Pyi Tit, Bawng Masha Bungli Dabang (Ye Bet Tsa-hkan) hpe KIA Dung 9 ni shang zing nhtawm, bawng masha n law htum 52 hpe shalawt dat sai re.

Dai mabyin hpang, Lahta Sam mung grau nna Kutkai, Muse hte Munggu ginwang ni hta Myen hte KIA gasat poi ni grau grau sawng wa na sat lawat pru ai lam, dai ginra na buga masha ni tsun ai.

Posted in: SHIGA