Myen asuya gaw KIA hpe myit masa majan baw

Myen asuya gaw KIO/KIA hte seng ai n jaw n teng ai shiga ni mungchying mungshawa ni de shamawng nna, myit masa majan baw dat sai re.

Jinghpaw mungdaw kata mare kaba ni rai nga ai Myitkyina, Manmaw, Waimaw hte Hpakan ni hta KIO/A hte seng ai masu ka tawn ai laika pa ni hpe agat ayai, shakap ai lam ni hpe lai wa sai August shata kaw nna galaw wa ai lam, buga masha ni tsun ai.

KIO/A ntsa mung shawa ni chye na shut hkra galaw ai ndai laika pa ni hpe Manmaw mare kata mawdaw lam ni hta agat ayai ai lam ni hte dum nta shakap ai lam ni hpe, August 20, ndai September praw 3 hte 5 ya ni hta galaw wa sai lam, myi-chyaw sakse buga masha ni tsun ai.

Dai asuya a masu laika ni hta “KIO gaw mungdaw a simsa lam hpe jahten ai lam, KIA kata ga garan sat hkat ai lam hte hpaga garan sha n htuk nna gali galaw ai lam ni hte Dukaba Gun Maw sat hkrum sai” ngu ai lam ni ka da ai lam, dai laika mu hti ai buga masha ni tsun ai.

Dai sha n ga, Myen asuya n-gup, September praw 6 ya na Myanmar Ahlin shiga laika hta mung “September praw 1 ya shani KIO ginjaw Laiza kaw simsa lam ra ai ni hte n ra ai ni lapran gap hkap nna marai langai si, lahta tsang du langai hkala ai lam” ka da ai.

Ndai shiga gaw n teng man ai re lam hpe KIA tau Dap Awn Daju, Du Up Daju Sumlut Gun Maw gaw bat lahkawng ya shana (Sept. 6) BBC Myen Radio hku nna ningdang kau sai re.

Ya na zawn KIO/A hte seng ai n jaw n teng ai shiga ni Jinghpaw mungdaw sha n ga mungdan ting madang shabra ai lam gaw, lai wa sai August shata hta mung shawa ni de KIO shabra dat ai, Myen asuya n’nan hte simsa lam bawngban n awngdang ai CD ntsa, matai htang ai mai byin ai nga nna, buga masha nkau myit sawn nga ma ai.

Myen asuya n’nan gaw tinang a shawng na lang shi laika sanglang dan poi hpe August 12 ya shani galaw ai shaloi mung, KIO hpe madung dat nna “gumlang hpung snr jahten sharun hpung” ngu masat shakut wa sai re.

Posted in: SHIGA