WFP gaw asuya kata na hpyen yen tsinyam ni hpe n-gu garan jaw

Myitkyina, N'Jang Dung Hkalup Nawku jawng wang kata shingbyi nga ai tsinyam yawng 100 jan hta na nkau hpe mu lu ai.

Mungkan Wunpawng Hpung (United Nations) npu World Food Program (WPF) gaw Jinghpaw mungdaw hpyen yen tsinyam ni hpe n-gu garum jaw sai re.
Myen asuya uphkang ginra Myitkyina hte Waimaw kaw nga ai hpyen yen tsinyam 5,000 jan hpe WFP gaw lai wa sai August shata hta garum jaw wa sai lam, buga kata hpyen yen lakawn lanawn hpung ni tsun ai.


Ya na zawn WFP hku nna n-gu garan jaw wa ai lam gaw Jinghpaw Mungdaw asuya hkringmang daju Salang Ngan Seng a ahkang jaw lajin ai hte maren re lam chye lu ai.

Ya ten Myen asuya uphkang ginra Myitkyina, Waimaw, Manmaw hte N’mawk mare ni hta hprawng shingbyi nga ai hpyen yen tsinyam yawng 10,000 mi grupyin re lam, tsinyam lakawn lanawn hpung ni hpe lakap let chye lu ai.

Ndai mare kaba de du ai tsinyam ni hpe shawng kaw nna garum jaw nga ai gaw J.W Hkristian nawku hpung ni hte Metta Development Foundation (MDF) ni re.

Myitkyina kaw du nga ai tsinyam ni hpe gaw Myitkyina Emergency Relief Team (MERT) hku nna madung dat garum jaw nga ai lam chye lu ai.  MERT hta MDF, Karuna Foundation hte J.W Hkalup hte Hkatawlik nawku hpung ni shanglawm ai re.

Maga mi de Miwa ga jarit KIO uphkang ginra de du nga ai hpyen yen tsinyam 20,000 ram gaw asuya n re ai maigan NGO uhpung ni a ading tawk garum ntum lam n lu la ai lam chye lu ai.  Ya ten shanhte hpe KIO hte Jinghpaw uhpung uhpawng ni hku nna madung dat garum jaw nga ai re.

Lai wa sai June shata kaw nna, Jinghpaw mungdaw shara shagu Myen hte KIA gap hkat lam dingyang byin nga ai majaw,  uhpung lahkawng uphkang ginra ni de hpyen yen tsinyam masha ni lani hte lani law jat nga ai lam sagawn chye lu ai.

Posted in: SHIGA