Tuesday, December 9, 2014

KIA kawn kyat sen hkying mi jan dan ai kani nanghpam, wan nat jahten

 Dec-8-2014 Lahta Sam mung KIA Dung 9 ginra e kani nanghpam wan nat lamang galaw nga yang

Lahta Sam Mung Kuthkai ginwang hta Wunpawng Mungdan Shanglawt Hpung (KIA) Dap Ba (4) npu Dap Dung (9) ginra e Myen kyat sen hkying mi jan dan ai nanghpam tsi mawan hpe wan nat jahten kau ai nga KIA Dap Ba (4) na Kani Nanghpam Pat Jasan Komiti Amu Madu Du Zau La tsun ai.

Kuthkai ginwang na KIA Dap Dung (9) ginra Hu Ban mare makau e December praw (8) ya shani kani chyang kl 3, kani hpraw kl 4.5, yama tsi hkyep 4,224, yama galaw ai kaw lang ai tsi joi 8 yawng rai yang Myen kyat 104,810,000 dan ai hpe wan nat jahten ai lam rai nga ai.

“Mani hkying 11:00 kaw hpang ai. KIA Dap Ba (4) na lit nga ai salang ni mung Shanglawt ni a nanghpam tsi mawan hte seng ai masa lam sanglang dan ai. Hkying 1:00 ten e gaw ya yang na manu hkying mi jan dan ai nanghpam tsi mawan ni hpe wan nat jahten kau ai. Ndai laman sha yama tsi galaw ai kaw jai lang ai tsi joi 300 jan hpe mung n dang htaw wa ai majaw dai kaw nan nat kaw ai” nga matut tsun ai.

Lahta Sam Mung KIA Dap Ba (4) dap up, Kani Nanghpam Pat Jasan Komiti lit hkam mung rai nga ai Dukaba Gara Zau Li mung nanghpam tsi mawan pat jasan lam hte seng nna lamang lung ai masha ni hpe sanglang hkaw tsun dan mat ai nga tsun ai. Dai lamang hpe buga ginra na kanu kawa ni hte hpawn yawng marai 350 jan sa du ai nga Du Zau La kawn tsun ai.

Lai wa sai September 27 ya shani Lahta Sam Mung KIA Dap Dung (9) ginra Kuthkai ginwang Hu Hpyet mare makau hta shawng ningnan lang nanghpam tsi mawan kani hpraw kl 26, kani chyang joi 13, yama tsi hkyep tawng mun 6 jan yawng rai yang ya yang na manu sen (2,000) jan dan ai hpe wan nat jahten kau sai rai nga ai.

Lahkawng lang ngu na nanghpam tsi mawan wan nat jahten ai lam hta kaji kajaw yawm mat ai raitim asuya uphkang shara hkan e gaw nanghpam tsi mawan yawm mat ai lam n nga ai hpe Du Zau La tsun ai.

Myen Mungdan hta kani hkai ai lam 2013 ning hta 57,800 hectares nga ai hta 2014 ning hta gaw 57,600 rai nna hectare 200 yawm mat ai nga Mungkan Wunpawng Kani Nanghpam hte Ru Hka Rung (UNODC) gaw December 8 ya shani na ndau laika shale dat ai. Kani shapraw ai lam Tan 870 nga ai kawn 2014 ning hta Tan 670 du hkra yawm mat sai nga ndau laika hta madun da ai.

UNODC sumtang hta kani hkai shatut ai lam hte nanghpam tsi mawan shapraw ai lam ni yawm wa sai ngu tsun nga ai raitim nanghpam tsi mawan yawm wa ai lam n nga ai sha laga nanghpam tsi mawan ni hpe hpan jashai nna gin shapraw ai lam ni naw nga nga ai nga Du Zau La tsun ai.

KIO gaw nanghpam tsi mawan pat jasan masing hpe mungshawa hte arau lata gindun nna galaw sa nga ai hta ya yang Jinghpaw Mungdaw, Lahta Sam Mung ni hta nawku hpung shagu, amyu sha bawsang shagu hte lata lata gindun let galaw sa nga sai rai nga ai.



0 comments:

Post a Comment