Hpyen masa shayawm na Myen hte bawngban ai lam hta KIO sa du na n re

 Dukaba Nban La, KIO Ningbaw malai

Asuya hte Wunpawng Mungdan Shanglawt Hpung (KIO) lapran gasat gala lam hte hpyen masa shayawm na lam a matu hpaw ninghtan da ai ginrun Manghkang Hparan Masit Hpung a hkrum shaga hpawng hta KIO maga kawn sa du na n re lam Dukaba Hkun Nawng tsun ai.

“Anhte ndai kalang gaw ninghtoi n masat sit da ai masa re. 19 ya shani byin ai manghkang hte seng nna anhte KIO hku na asuya hpe laika ka bang da ai lam nga ai. Ndai lang gaw Slg. Awng Min hte ndai lam hte seng nna bawngban hparan na matu galaw ngut ai hpang she anhte hpang daw de bai galaw na re” nga shi kawn tsun ai.

Du jawngma ni si mat ai mabyin hte seng nna munghpawm madang hparan na matu KIO gaw myen asuya hpang de laika sa dat sai raitim ya du hkra lama ma htang shana wa ai lam rai n nga ai lam matut tsun ai.

November 19 ya shani Myen asuya hpyen dap kawn laknak kaba gap bun ai lam a majaw KIO du jawngma 23 si mat ai lam hte seng nna asuya maga lama ma mahtai jaw wa yang she manghkang hparan masit hpung ni matut bawngban jahkrup mat na matu ra sharawng ai lam Manghkang Hparan Masit Hpung malawm Dkb. Hkun Nawng tsun ai.

Lai wa sai May shata kawn Myen asuya hte KIO ni shata shagu shawng na bat hta hkrum shaga hpawng chyawm nga ai raitim KIO Manghkang Hparan Masit Hpung gaw hkrum shaga hpawng chyawm ai lam hta shang lawm sana n re lam shi kawn tsun ai.

Lai wa sai August shata kaw nna October shata laman lahkawng maga gasat gala lam yawm mat ai majaw lahkawng maga makam grau ngang wa ai nga KIO maga kawn tsun shapraw da ai.

Munghpawm Simsa Lam Hkrang Shapraw Komiti (UPWC) hte KIO ni maga mi marai 5 hpra hpra shanglawm nhtawm myit hkrum hpaw ninghtan da ai Manghkang Hparan Masit Hpung hpe Myitkyina ginwang KIO a Machyoi Hpung Rap Daw rung gawk e lai wa sai May 28 ya shani hpaw ninghtan dat ai re.

Dai manghkang hparan masit hpung hta Myen asuya maga kawn Jighpaw Mungdaw mung jarit hte shim lam hkringmang Dukaba Tan Awng ningbaw hku shanglawm nhtawm KIO maga kawn ginjaw na Dukaba Zau Tawng ningbaw hku shanglawm ai re lam chye lu ai.

2013 ning October shata UPWC hte KIO ni Myitkyina ginwang hta hkrum shaga bawngban hpawng chyawm ngut ai hpang hpyen masa shayawm na lam hte majan kahtap nna n byin na matu ginrun yu reng komiti hpe manghkang byin ai ginra shagu hta akyu jashawn mai ai hpaw shaban hkrang hte hpaw shabawn mat na matu myit hkrum da ai lam rai nga ai.

Posted in: SHIGA