7 lang ngu na mungdan ting madang gap hkat jahkring bawngban hpawng hpe du na 2015 ning January shata kaang daram hta kahtap hkrum shaga na matu Mungdan Ting Gap Hkat Jahkring Bawngban Jahkrup Hpung (NCCT) hte asuya Munghpawm Simsa Lam Hkrang Shapraw Komiti (UPWC) ni jawm myit hkrum da masai.
December 22 ya hte 23 ya shani Yangung Myanmar Peace Center (MPC) ginjaw e 2 ya sha hkrum shaga bawngban ai lam hta mungdan ting gap hkat jahkring lam hte seng ai lahkawng maga na bungli yi-ngam bawngban jahkrup hpawng ngut ai hte ginrun ndau shabra laika shale dat ai lam re.
“Anhte ni September shata na NCA ga shaka hta bawngban n ngut ai dawshan ni matut bawng ai. Ga shaka ntsa grau grau myit hkrum ai daw ni lu la wa ai. Raitim, ndai kaw gaw bawngban jahkrup ai hpawng she re majaw anhte shagrin da n mai ai. Seng ang ai de tang madun nhtawm 7 lang ngu na bawngban hpawng hta kalang bai dawdan shagrin na rai nga ai” nga NCCT a Ningtau Ningbaw Badu-koi Htu Win kawn tsun ai.
NCCT maga kawn Laiza hta byin mat ai mabyin zawn kahtap nna n byin na matu bawngban hpawng galaw na lam, gap hkat jahkring da ai aten lahkawng maga hkan nang hkansa ra ai arawn alai tarawng tara ni hte dai hpe tawt lai ai ni hpe pat hkrum na matu ginrun yu reng komiti hpaw ninghtan na lam, bawngban hpawng ni hte ga shaka la ai hta sakse sakgan ni da na lam ni hpe numshawn shaw da ai nga Badu-koi Htu Win tsun ai.
Mungdan ting gap hkat jahkring hkrang nhprang (NCA) bawngban ai lam hta lahkawng maga myit hkrum ai lam lu la sai raitim shanhte a myit hkrum da chyalu dai dawshan ni hpe Munghpawm Simsa Lam Hkrang Shapraw Komiti hpang de Hkringmang Slg Awng Myin kawn kalang bai tang madun nhtawm shagrin ya ai lam lu na matu hte NCCT mung seng ang ai uhpung uhpawng ni hpang de kalang bai tang madun nhtawm shagrin ai lam lu na matu ra gadawn ai nga shi kawn tsun ai.
2 ya sha bawngban ai lam ni hpe seng ang ai de tang madun nhtawm masat shagrin ya ai lam lu la na matu dut dang ai lam n nga ai sha atsawm sha lu bawngban mat ai zawn, NCCT N/T Ninbaw Badu-koi Htu Win hku na mung du na 2015 February shata 12 ya Munghpawm Masat Nhtoi shani e mungdan ting gap hkat jahkring myit hkrum ga shaka la yang manu ai nga Shiga Htawn ni a man hta tsun wa ai majaw n-gun lu ai lam nga ai nga MPC kawn Slg. La Mawng Shwi tsun ai.
“Bawngban ai gaw NCA hpe npawt ndung hkren bawngban lu ai. Dai bawngban ai lam ni hpe mung bai tang madun nna masat shagrin ya ai lam tang na. Lu la ai hpang lapran hta bungli hpung ni bai hkum shaga na. Dai hpang 2015 January shata ka-ang hta bai hkrum na. Anhte grai n-gun lu ai. Bawngban ai shaloi hpa dut dang ai lam n nga ai. Masat shagrin ya ai lam hte mahtai bai jaw na matu ngu ai mahkrun ni ram sha ngam ai” nga matut tsun ai.
Simsa lam lamyan hpe mungdan ting gap hkat jahkring lam hte seng ai myit hkrum lam lu la na bungli, mungmasa bawngban hpawng hte seng ai masa lamyan bungli, mungmasa bawngban hpawng hpawng na lam bungli madang lawan ladan galaw na matu lahkawng maga myit hkrum ma ai nga ginrun ndau hta shaleng da ai.
UPWC maga kawn Hkringmang Slg. Awng Min, Myihprap N-gun Hkringmang Slg. Hkyin Mawng Tsu, Masha Pru/Shang Gawnhkang Lam hte Mungshawa N-gun Hkringmang Slg. Hkin Yi, Shimlam hte Mung Jarit Hkringmang Du Up Jum Tet Nai Win, Rap Daw Salang Slg. Ting Zaw ni sa du nna NCCT maga kawn Badu-koi Htu Win, Du Up Hkun Uk Ka, Latdu Up La Awng, Slg. Htun Zaw, Dr. Salai Lyanmung Sa Hkawng ni sa du bawngban mat ai lam rai nga ai.
Raitim, mungdan ting madang gap hkat jahkring hkrang nhprang ntsa 2 ya sha bawngban ai lam hta hpyen dap hte amyu sha laknak hpai hpung lahkawng maga na ntsa tsang hpa-awn ni sa du ai lam n nga ai.
0 comments:
Post a Comment