Gap sat hkrum ai jawngnum kasha a manghkang jep sagawn ya na asuya de hpyi

 Mara kata gap sat hkrum ai Tsang 9 jawngnum Ja Seng Ing

Jinghpaw Mungdaw Hpakan ginwang kawn tsang (9) jawngnum si mat ai manghkang mabyin masa hpe jep shapraw ya na matu Myen asuya maga jep shagawn komishin langai hpaw ya na lam, si mat ai wa a kawa hte dai manghkang hte seng nna mabyin masa sawk sagawn komiti ni kawn hpyi shawn dat ai.

2012 ning September 13 ya Hpakan ginwang Maw Wan mare lawk (1) Sut Ngai Yang kahtawng na asak 14 ning pang tsang (9) jawngnum Shy. Ja Seng Ing hpe gap kau ai Myen asuya dap hpung ni hpe jep joi ya na matu December (6) ya shani hpyi shawn dat ai lam rai nga ai.

“Nye kasha si mat ai manghkang hte seng nna gara hku byin mat ai ngu ai hpe tara rapra ai hku jep shagawn komishin hpaw nna mabyin masa hpe jep shapraw ya na matu anhte hpyi shawn da ai re. Ngai hpe mung hpyen dap ni tara jawat da ai hte seng nna sanglang dan ai” nga si ai wa a kawa Slg. Brang Shawng kawn tsun ai.

Ma si mat ai manghkang ntsa jep shagawn ahkyak la ya na matu Myen mung amyu sha shinggyim ahkaw ahkang komiti hte hpawn Gumsan Magam Slg. Ting Tsing hte tara masa kaup lam hte simsa ngwi pyaw lam komishin ningbaw Slg Jan. Awng San Tsu Chyi hpang de 2012 ning October praw (1) ya shani Slg. Brang Shawng kawn shawk shawn laika shagun dat sai rai nga ai.

Shawk shawn laika hta Myen asuya hpyen dap n-gun 80 jan lawm ai Hk.M.Y Masat (389) hpyen hpung ni gaw manghkang byin mat ai shani Maw Wan mare hta hkring nga ai hpang shana maga hkying 4:00 ten hta mare kawn le wa na hkyen lajang nga ten kapaw ai nsen na ai majaw KIO ngu shadu nhtawm dai mare kata hkup mara gap ahprup mat ai nga shaleng da ai.

Dai shawk shawn laika hte seng nna kawa rai nga ai Slg. Brang Shawng hpe n jaw n teng ai hku shawk shawn ai ngu nna Hpakan ginwang tara rung kawn daw; 211 hte 2013 ning March 11 ya shani Myen asuya a ningtau hpyen man up Dukaba Za Nyi Lin Pai kawn shawk jawat da ai. April praw 8 ya hta Hpakan ginwang tara rung kawn kyat sen 6 hte pahkam hkam da ya ai lam rai nga ai.

2013 ning September praw (9) ya shani Slg. Brang Shawng hpe jawat jana da ai hpang rung shawk wa; Dukaba Za Nyi Lin Pai hpe tara rung kawn shaga ai raitim ya daini du hkra tara rung de sa du ai lam rai n nga ai lam Slg. Brang Shawng kawn tsun ai.

“Shi a rung daju gaw Pahkukku de htawt mat sai nga ai majaw Hpakan Tara Rung kawn shi hpe shaga laika shapraw ai shaloi Pahkukku Rung Daju kawn hpa tsun wa ai i nga jang Pahkukku kaw magam gun hpai ai lam n nga sai nga laika bai shang wa ai. Dai hpang Hpakan Tara Rung gaw shi gara de htawt mat ai gara kaw magam matut gun mat ai ngu hpe n chye mat ai. Shi gara kaw magam gun ai hpe n chye nna na taw nga ai. Shi a hkringdat hpe gale galau di nna aten garawt taw nga ai” nga matut tsun ai.

Lai wa sai 2 ning jan na mat sai raitim shi hpe jawat da ai manghkang jep joi lam rai n ngut lu ai majaw du na December 15 ya shani hta e gaw 48 lang ngu na rung dung ninghtoi bai masat da ya ai nga chye lu ai.

Manghkang byin ai shani e Shy. Ja Seng Ing hte arau Saranum Nang San hte jawngnum marai 4 ni mung jawng kawn wa ten gap kapaw nsen ni a majaw lam kau yang e makoi nga ten.. yawng le wa na matu Myen asuya hpyenla ni jahkrit shama wa ai majaw le wa ten Shy. Ja Seng Ing a dangbau kaw pala hkra mat nhtawm si mat ai lam re nga chye lu ai.

Posted in: SHIGA