Simsa lam a matu NCCT hte Myen asuya Chiang Mai kaw hkrum shaga bawngban

Dec 2-2014 asuya MPC hte amyu sha rawt malan hpung NCCT salang ni Htai mung, Chiang Mai mare kaw zuphpawng galaw nga yang

Mungdan ting gap hkat jahkring ga shaka (nhprang) bawngban na matu Mungdan Ting Madang Gap Hkat Jahkring Bawngban Jahkrup Hpung (NCCT) hte Myanmar Peace Center (MPC) ni Htai Mungdan Chiang Mai mare na Imperial manam jarawp e lahkawng ya hkrum shaga bawngban mat ai.

December praw 2 ya jahpawt daw hkying 10:00 jan kawn shana maga hkying 5:00 jan ten du hkra mungdan ting madang gap hkat jahkring hkrang nhprang 4 ntsa bawngban mat nna NCCT maga kawn bawngban da chyalu hkrang nhprang hpe kalang bai gram lajang ai lam, jat bang ai lam ni galaw mat nhtawm NCCT gaw UPWC N/T Ningbaw Slg. Awng Min hpang de ga san ni san dat ai nga NCCT N/T Ningbaw Badu Koi Htu Win tsun ai.

“Laiza kaw byin mat ai mabyin a majaw hpyenla ni si hkala ai lam ni myit machyi ai lam ni nga ai lam ntsa maga mi de ndai mabyin hpe kalang bai awai la lu hkra lama ma bai gap gasat wa ai lam ni n nga na matu lit la sa mat wa na matu, mungdan kata bawngban ai lam a matu shim lam hpe mung bawngban mat ai. Hkawmsa hkawmwa lam ni le i. Bai langai gaw hkrum shaga bawngban lam galaw ai shaloi anhte a bawngban ai lam hta maga mi hta lit nga ai myit su ni a maram yu ai lam, bai htang shana wa ai lam ni hpe la yu nhtawm dai hpe lu la ai hpang anhte kalang bai hkrum shaga bawngban lu na matu dawdan mat na rai nga ai” nga shi kawn Shi Htawn ni hpe htai dan ai.

Lai wa sai November 19 ya shani Wunpawng Mungdan Shanglawt Hpung (KIO) Ginjaw Laiza hta Myen asuya laknak kaba gap ai majaw Du Jawngma 23 si mat ai lam ntsa kalang bai n-gun awai la na matu, du na 7 lang ngu na NCCT hte UPWC ni hkrum shaga bawngban na matu, NCCT dat kasa ni a shim lam hte laga amyu sha bawsang ginra ni hkan gap hkat ai lam ni n nga na matu asuya maga kawn lit la galaw sa ai lam nga n nga ngu ai daw ni hte hpawn daw 5 hkawt hpe Badu Koi Htu Win kawn tsun ai.

Shanhte san da ai lam ntsa UPWC maga kawn kalang bai htang shana wa ai hta hkan nna shanhte numshawn shaw da ai du na December 17, 18 hte 19 ya shani ni hta hkrum shaga bawngban na matu kalang bai htang shana mat na re lam Badu Koi Htu Win kawn tsun ai.

NCCT kawn san wa ai lam ntsa UPWC gaw htai na yak ai ga san n re majaw mungdan ting gap hkat jahkring lam ntsa matut nna bawngban lu wa na re ngu kam ai lam matut tsun ai.

Gade n na ai aten laman bai htang shana hkat nhtawm NCCT hte UPWC ni December shata laman kalang bai hkrum shaga bawngban lu wa na re ngu myit mada ai lam MPC kawn Slg. La Mawng Shwi tsun ai.

“Anhte shanhte a jasat jasa ni hpe san wa sai. Dai hpe Hkringmang Awng Min hpe bai tang madun nhtawm tara shang bawngban hpawng ni hkan shagrin mat wa mai ai. Law malawng gaw hkrak na re. NCCT maga kawn Slg. Awng Min hpe san da ai daw ni ndai hpawtni hpawtdin hkan gaw htang shana wa ra ai. Myit mada da ai hta jan nna lu jahkrup ai hpe mu lu ai” nga shi kawn tsun ai.

Lai wa sai November 27 ya shani MPC hte NCCT dat kasa ni Htai Mungdan Chiang Mai mare hta hkrum shaga bawngban mat ai. NCCT uhpung shang ni gaw mungdan ting gap hkat jahkring lam a matu Myen asuya hte bawngban na naw ngam ai daw 8 hpe lai wa sai November 30 hte December praw 1 ya shani lahkawng ya tup bawngban jahkrup mat ai rai nga ai.

Posted in: SHIGA