Jinghpaw hpyen yen tsin-yam masha ni a matu Jinghpaw Wunpawng Hkalup Hpung Ginjaw (KBC) kawn gam jaw na arai ni hpe Myen asuya a Lahta Sam Mung Muse, Deng (105) hpaga ginlen shagyit Matsun Du Du Up Tin Ye Win kawn laidi ahkang pat shingdang da ai re nga Muse ginwang Mung Mau Hkalup Hpung kawn Rev. Zau Ra tsun ai.
KBC gaw galoi mung Lahta Sam Mung Kuthkai, Nam Hkam, Man Dung, Man Wing, Nam Hpak Ka, Mung Ji hte hpawn tsin-yam dabang 15 kaw na tsin-yam masha ni a matu Mandalay kawn bu hpun palawng hte nba ni htaw lung wa ai hpe Muse Deng (105) shagyit hta laidi na hpe pat shingdang da ai lam rai nga ai. Sam Mungdaw Hkringmang Daju a lata masat lawm jang she laidi ahkang jaw na nga Du Up. Tin Ye Win kawn tsun mat ai nga shi kawn tsun ai.
“Anhte ni gaw tsin-yam masha ni hpe nba ni hkyak hkyak sa sa na matu re. Hkyak hkyak re nga yang madi shadaw laika ni n lawm lung wa ai. Anhte KBC rung a madi shadaw laika mung shanhte hpe jaw da chyalu re. Ya mung madi shadaw laika sha naw hpyi taw ai nga yang yak taw nga ai le” nga matut tsun ai.
KBC ginjaw rung hte seng ang ai uphkang rung ni kawn madi shadaw laika madun yu timung dai wa gaw “moi gaw hpa n ra ai ngu tsun yang… moi na lam ngut mat sai. Hpa n seng ai. Ya nye lak htak hta ra ai nga tsun ai” nga Rev. Zau Ra kawn tsun ai.
Matsun Du Du Up Tin Ye Win gaw Deng (105) de htawt wa ai shata mi jan rai sai lam shi kawn tsun ai. Lai wa sai November shata laman mung garum ntum arung arai ni htaw wa ai mawdo kaba 2 hpe Deng (105) shagyit hta 10 ya hkawt laidi ahkang pat da nna mawdo mi hta Myen kyat sen 2 jaw nhtawm she lai mai ai lam chye lu ai.
UN garum ntum n lu ai majaw KBC kawn shakut nna garum nga ten ya na zawn pat hkum da yang gaw tsin-yam masha ni a matu mayak mahkak hkrum wa chye ai nga matut tsun ai.
“UN kawn garum ntum n lu ai majaw anhte maga na mai byin ai hku sa jaw na shakut taw ai. Shi gaw anhte sa garum jaw ai hpe ya na zawn dingbai dingna jaw ai zawn galaw taw ai nga yang anhte mung myit htum wa ai. Anhte KBC Amu Madu mung maigan gan le taw nga ai majaw shi wa jang she bai jahkrup na” nga Rev. Zau Ra tsun ai.
Jinghpaw Mungdaw hte Lahta Sam Mung ni hta Myen asuya hte amyu sha laknak hpai rawt malan hpung ni lapran na majan nhpan a majaw hpyen yen tsin-yam masha ni matu malu masha hte bu hpun palawng ni sa jaw na ahkang n lu ai gaw shata 2 hkawt rai sai lam UN shinggyim nauna garum ntum lam bawngban jahkrup hpung (UNOCHA) kawn December 16 ya shani ndau laika shale dat sai re.
Lai wa sai September shata kawn UN garum ntum n lu mat ai majaw tsin-yam masha ni hpe hkyak hkyak garum madi shadaw la lu hkra ginra kata KBC hte hpawn asuya n re ai uhpung uhpawng ni jawm garum madi shadaw la ai lu la taw ai a marang ya yang gaw naw tsamai nga ai lam KIO kawn lakawn lanawn komiti lit hkam Salang Kaba Labang Doi Pyi Sa tsun ai.
0 comments:
Post a Comment