Wednesday, December 17, 2014

Hpakan de hpyen masa kalang bai shuk wa ai majaw, mare masha ni hprawng yen


Jinghpaw Mungdaw Hpakan ginwang Nam Hpyit mare hta Myen asuya dap ni hte Wunpawng Mungdan Shanglawt Hpyen Dap (KIA) lapran December 13 ya shani kawn hpyen masa shuk wa ai majaw mare kahtawng masha ni hkrit tsang nna hprawng yen hkawm nga ai lam chye lu ai.

December 15 ya shana daw kawn December 16 ya jahpawt du hkra Nam Hpyit mare na Hkatawlik (RC) hpyen yen tsin-yam dabang de hpyen hprawng masha 50 hkawt gaw gadai mung gadai chye ai hku hprawng bang wa ai nga dai dabang kawn lit nga sara langai KNG Jinghpaw Shiga Dap de tsun ai.

“Masha bai kahtap du wa ai nga yang grai yak ai. Moi gaw UNHCR, Gayu-na, WFP hpung ni n-gu ni garum madi shadaw la ai. Ya shaning htum wa maga she gajawng gaja hprawng bang wa ai nga yang grai yak hkak wa ai. Lu na sha na, nga shara a matu gumhpraw ni buhpun palawng ni n lawm wa ma ai. Shanhte ni nam maling hku nam dawk dawk nna gawai bang wa ai nga yang”

Nkau kahtawng masha ni gaw kahtawng kawn hprawng le na mung hkrit nga nna Hkatawlik tsin-yam dabang de sa shaga na matu laika pa mi shagun dat ai majaw dai lam hte seng nna jawm hparan lu hkra hkristan hpung shagu na lit nga ai ni hpang de kanan hpe shing shing rai shabra nhtawm bawngban hparan mat na re lam tsun ai.

Myen asuya dap Dap Nu masat (66) dap ni mung mare masha ni yi sa yi wa hte gat sa gat wa ai lam ni hpe pat shingdang nga nna gat kawn wa ai mare masha nkau hpe mung mare de shang wa ahkang pat hkrum nga ai majaw hkrit kahpra nna hprawng yen wa ai lam re nga kahtawng masha ni kawn chye lu ai.

Masha n-gun 100 mi jan nga ai Nam Hpyit tsin-yam dabang de kahtap hprawng bang wa ai ni gaw dabang hte deng 3 gang ai Ga Ra Yang kahtawng kawn re lam chye lu ai.

Myen asuya dap Hpakan daju Dap Nu masat (66) gaw December 13 ya kawn Wunpawng Mungdan Shanglawt Hpyen Dap (KIA) hte hpyen masha chya hkat wa ai majaw Nam Hpyit mare makau na kahtawng masha ni hkrit kajawng nna hpawng yen wa ai re lam chye lu ai.

Myen asuya dap gaw, ya ten Seng Tawng mare dingsa e laknak kaba shadun da nhtawm n-gun jat bang da sai lam chye lu ai. Myen asuya gaw September praw 1 ya shani Hpakan lungseng maw bai hpaw nna Company ni kalang bai shang bang wa ai ten kawn hpyen n-gun jat bang wa nhtawm October hte December hta mare masha ni hpyen yen tsin-yam masha hku nna numdaw hkawng lang ngu na kahtap hprawng yen wa ai lam rai mali ai.



0 comments:

Post a Comment