 |
| Dec-4-2014 Htai mung a dingdung daw Ban Mai Samahki Jinghpaw mare e Manau Poi galaw nga yang |
Htai Mungdan a dingdung daw Chiang Mai ginwang Chiang Dao ginwang daw Ban Mai Samahki mare na Jinghpaw Wunpawng amyu sha ni a 6 lang ngu na Wunli Hkridip manau poi hpe December praw 4 ya shani galaw hpang nga sai rai nga ai.
December praw 4 ya jahpawt hkying 9:00 kawn Htai Hkawhkam Bhumibol Adulyadej a 87 ning hpring shangai nhtoi shagrau ai lamang hpe Htai asuya salang langai hku nna woi awn let galaw nhtawm Jinghpaw Wunpawng Amyu Sha Hpung (KNO) Ningbaw Duwa Bawmwang La Raw kawn manau poi hpaw hpang dat ai lam rai nga ai.
“Dai hpawt hkying 9:00 kawn Htai Hpyen Dap na salang langai woi awn nna Htai Hkawhkam a shangai nhtoi hpe shagrau sha-a ai lamang galaw mat ai. Manau poi hpe Duwa Bawmwang La Raw kawn hpaw nhtawm manau nau hpang ai, hkying 12 jan hta ngut ai” nga Manau shabyin shatai komiti ningbaw Slg. Hkawng Hawng kawn tsun ai.
Manau Poi de Wunpawng Mungdan Shanglawt Hpung (KIO) Ningbaw Malai Dukaba Nban La, Jinghpaw Wunpawng Amyu Sha Hpung (KNO) Ningbaw Duwa Bawmwang La Raw hte Jinghpaw Wunpawng Amyu Sharawt Hpung (PKDS) ningbaw Sutdu Nsang Tu Awng ni mung sa du ma ai.
Dai hpang Htai asuya laksan hpyen hpung kawn shangwi shapyaw hpung ni, Miwa Mung Yunnan Mungdaw Shwi Li, Yin Kyang, Mang Shi, Gala Mung, Japan, Singapore, Htai Mungdan Bangkok, Chiang Mai ni kawn Jinghpaw Wunpawng myu sha ni yawng marai 1,000 jan sa du ai nga chye lu ai.
2002 ning kaw nna Htai Hkawhkam Bhumibol Adulyadej a shangai nhtoi hpe shagrau ai hku nna Jinghpaw Wunpawng myu sha ni gaw 2 ning hta kalang Manau Poi galaw ai hta daining gaw 6 lang ngu na manau poi galaw ai lam mung rai nga ai.
Madung hku nna gaw Htai Hkawhkam Bhumibol hkamja sak galu na matu, Htai Mungdan mungmasa simsa ngwi pyaw na matu, tsan gang nga ai Jinghpaw Wunpawng myu sha ni hkrum zup ai lam, Wunpawng htunghkying hpe mungdan gadaga mu chye wa lu na matu yaw shada let galaw ai lam re nga Slg. Hkawng Hawng kawn tsun ai.
Daini gaw Wunli Hkridip Manau Poi de shawa masha 1,000 jan sa du nna marai 700 hkawt hkying hkum lahkawng jan Manau nau dan mat ai nga shi kawn tsun ai.
Du na December shata praw 7 ya hta mung Manau Poi lung ai ni kawn tinang Mungdan simsa wa na matu, hkrat sum mat sai Wunpawng Mungdan Shanglawt Hpung (KIO) magam gun hpyenla ni, shawnglam hta du taw nga ai magam gun ni a matu akyu hpyi lamang mung galaw mat na re lam chye lu ai. Htai Mungdan hta Manau Poi hpe galaw nga ai raitim Myen Mungdan kata na hpyen yen tsin-yam masha ni a matu mung arau sha hkam sha nga ai lam matut tsun ai.
Jinghpaw Mungdaw Myitkyina hta mungdaw asuya gaw 67 ning hpring Manu Poi galaw na matu hkyen lajang nga ai lam hpe mung mungdan kata masa simsa ai lam rai n nga ai majaw Manau Poi galaw ai lam hpe Jinghpaw Wunpawng myu sha ni ninghkap ai lam hpe mung Htai Mungdan du Jinghpaw Wunpawng myu sha ni ninghkap ai lam Slg. Hkawng Hawng kawn tsun ai.
“Shanhte Jinghpaw ni nan woi awn nna galaw na nga jang gaw n-gun jaw ai. Mungdan gadaga du taw ai anhte ni mung sa du n-gun jaw na. Rai timung masha ni gumhpraw jaw nna galaw shangun ai rai yang manu dan dik ai anhte a Htunghking hpe gumhpraw hte n mai galai ai. Ndai hku gumhpraw jaw nna galaw na rai yang n-gun n jaw ai” nga tsun ai.
Hpawt de December praw 5 ya hta gaw Htai Hkawhkam a 87 ning hpring shangai nhtoi shagrau sha-a ai lamang galaw mat nna htawngka ka shingjawng ai lam, shana daw Htai asuya hpyen dap shangwi shapyaw hpung kawn ka manawt na lam, amyu lakung hte lakung tinang a htunghking ka hkrang ni hte manawt dingsawt dan mat na lam ni re lam chye lu ai.
December praw 6 ya shani hta Mungdan gadaga kawn sa du ai Jinghpaw Wunpawng htunghking dat kasa ni a zuphpawng galaw nna shana maga de Myen Mung kawn du sa ai Yak Tim Pyaw Tim Rau (RAU) hpung ni, Jinghpaw Wunpawng ka hkrang hpung ni a shangwi shapyaw ka manawt dan ai lamang ni galaw mat na rai nga ai.
Lai wa sai 2002 ning kawn galaw hpang wa ai Manau Poi hpe 6 lang ngu na lamang galaw ai lam mung rai mali ai.
Htai Hkawhkam gaw tinang mungchying sha n rai tim Jinghpaw Wunpawng myu sha ni hpe nga na ahkang jaw ai hta sha n ga Htai Hkawhkam a masing hte maren hkai lu hkai sha na matu nli tum ni garan jaw ai hta sha n ga ngai wa ai nsi naisi ni hpe mung manu atsawm jaw nna bai mari ya ai nga Slg. Hkawng Hawng kawn tsun ai.
Lai wa sai shaning hta laklai ai gaw Manau Poi hta Myen Mung, Miwa, Gala, Japan hte Htai Mungdan du Jinghpaw Wunpawng myu sha ni hte laga bawsang ni hte hpawn yawng 2,000 hkawt sha du na re ngu maram da ai lam chye lu ai.
Htai Hkawhkam gaw Bat Mai Samahki mare hta Jinghpaw Wunpawng myu sha ni hpe nga na ahkang jaw ai gaw shaning 32 ning du sai rai nna ya yang htinggaw 120 jan nga nhtawm Jinghpaw, Lisu, Maru (Lawngwaw), Rawang, Lachyik, Zaiwa amyu lakung ni nga shajang ai lam rai nga ai.
0 comments:
Post a Comment