Monday, December 15, 2014

UN garum ntum hkring nga ai majaw Jinghpaw tsin-yam dabang hta lu sha yak wa na

KIO/KIA mare daju Laiza hpyen yen dabang

Wunpawng Mungdan Shanglawt Hpung (KIO) uphkang ginra hpyen yen tsin-yam masha ni a matu Mungkan Wunpawng garum ntum uhpung uhpawng ni garum ntum gan hkring mat ai majaw tsin-yam masha ni a matu malu masha kyet ai manghkang byin wa chye ai nga tsin-yam masha lakawn lanawn nga ai ni kawn tsun ai.

Lai wa sai October shata kaw nna Mungkan Wunpawng (UN) garum ntum uhpung uhpawng ni a malu masha madi shadaw ai lam ni hkring mat ai majaw ginra kata na asuya n re ai garum ntum hpung ni a garum madi shadaw la ai lam ni hte sha hparan taw nga ai lam lakawn lanawn hpung lit hkam Salang Kaba Labang Doi Pyi Sa tsun ai.

“Anhte ni mung lam amyu myu hku nna hparan taw nga ai. Malu masha gaw ginra uhpung uhpawng ni jaw sha taw ai. Nta gap ai lam mung naw galaw nga ai. October 27 ya shani sa na nga nna n sa sai. Asuya ahkang n jaw na re ngu shadu ai. Na wa jang gaw laga mahkrun ni tam ra sana le, nta gap ai mung rai n ngut shi ai”

Dai hpang UN garum ntum hte Laiza ginjaw ginra kata na gap ra ai nta 1,000 mi jan kawn kaang hkup hpe gap nga magang sai lam, du na 2015 March shata du hkra zupzi gap shakre na re nga tsun ai lam Slkb. Doi Pyi Sa tsun ai.

Ya yang na tsin-yam masha ni hpe Metta Foundation, Gayu-na, Jinghpaw Wunpawng Hkalup Hpung Ginjaw (KBC), Wunpawng Ninghtoi (WPN) ni kawn jawm garum madi shadaw la nga ai nga matut tsun ai.

Dai uhpung uhpawng ni gaw hpyen yen tsin-yam masha ni hpe hkyak hkyak garum madi shadaw la lu na matu hpaw shabawn da ai uhpung 9 re “jawm garum madi shadaw ai uhpung ni” gaw n-gu hte malu masha hta sha n ga n-gu n lu htaw sa ai shara ni hkan gumhpraw ni hte garum madi shadaw la taw ai nga Metta Foundation a Director Tsai Tsan Hkam kawn tsun ai.

“October shata kaw nna UN a garum ntum gaw KIO uphkang ginra kata na dabang ni hpe malu masha ni sa garum madi shadaw na masing gaw nga ai. Mungkan Wunpawng Malu Masha Uhpung ni mung dai mawdaw yan kaw lawm na matu hkyen da ai. Rai timung dai maga hpyen masa shuk taw ai majaw n lu sa sai. Nkau shara ni hkan malu maha shata mi na naw ngam ai. Nkau shara ni hkan gaw 15 ya na ram sha ngam taw sai. Dai zawn yak hkak hkrum nga ai” nga tsun ai.

Ya yang hpyen masa shuk nga nna UN garum ntum n lu ai majaw tsin-yam masha ni a matu mayak mahkak hkrum wa chye ai mabyin masa a majaw shanhte a jawm garum madi shadaw ai uhpung ni gaw UN hte mungdan gadaga uhpung uhpawng ni hte bawngban jahkrup ai lam ni galaw nga ai lam shi matut tsun ai.

“Malu masha kyet mat ai kaw du hkra n byin na matu gara hku jawm hparan ra na ngu ai hpe bawngban jahkrup nga ga ai. Anhte maga mung hkyak hkyak mahkang a matu tau hkrau hkyen lajang da ai zawn re gaw galaw nga ga ai. Ra ai shara de du hkra anhte sa na matu shakut nga ai” nga tsun ai.

Ya yang Mai Ja Yang na tsin-yam masha ni palawng lum ra gadawn taw ai nga Mai Ja Yang na tsin-yam masha ni hpe sa du garum madi shadaw la ai Wunpawng Ninghtoi (WPN) kawn Shd. Zai Du tsun ai.

Lai wa sai November 19 ya shani Laiza na KIA Hpyen Du Shalat Jawng hta Myen asuya hpyen dap a laknak kaba hkat ang ai majaw Du Jawngma 23 si mat nna KIO gaw dai manghkang hte seng nna Myen asuya maga lama ma hparan ya na matu hpyi shawn da ai lam nga ai.

2011 ning June shata Myen asuya hte KIA majan a majaw hpyen yen tsin-yam masha sen mi jan du hkra rai mat nhtawm KIO uphkang ginra kata mun 6 jan nga ai lam Slkb. Doi Pyi Sa kawn tsun ai.

Shingrai tsin-yam masha ni a matu UN garum ntum arai ni hpe 2012 ning du hkra asuya maga kawn pat hkum da ai majaw garum ntum lam n lu ai re. Raitim 2013 ning September shata kawn Laiza hte Mai Ja Yang tsin-yam dabang ni a matu UN garum ntum n-gu hte tsi mawan, dinghku arai ni hpe hkap la lu sai rai nga ai.



0 comments:

Post a Comment