Monday, December 22, 2014

Jinghpaw pati ni hkyawm na matu lahkawng lang jahkrup wa

Dec-19-2014 Jinghpaw pati pawng hpawm na lam YMCA-Myitkyina kaw zuphpawng galaw nga yang

Jinghpaw Mungdaw hta nga ai Jinghpaw pati ni langai sha byin hkra pawng hpawm lu na matu Jinghpaw Mungshawa Nsen Shapaw Komiti kawn woi awn nhtawm Jinghpaw pati ni hpe saw shaga let December 19 ya shani hta e 2 lang ngu na bawngban hpawng hpe Myitkyina YMCA gawk nu hta galaw mat ai.

Pati pawng hpawm lam a matu pati 3 hte hkrum shaga ai lam rai nna lai wa sai ten bawngban mat ai hta n-gun yawm ai lam nga ai raitim ndai kalang hta gaw jat wa ai lam nga ai nga Mungshawa Nsen Shapraw Komiti kawn ningbaw Sara Lamawng La Tawng KNG Jinghpaw Shiga Dap de tsun ai.

“Daini bawngban ai hpe yu yang mahtai kaja wa ai ngu mai tsun ai. KNCD pati gaw shawng ningnan lang pawng hpawm na matu bawng ai shaloi… n pawng ai. Pawng mayu ai ni KNCD kaw mahtang shang wa marit nga tsun ai. Raitim daini na bawngban hpawng hta KNCD gaw ‘anhte ni pawng hpawm ra sai’ nga nna tsun wa ai” nga tsun ai.

Dai bawngban hpawng hta Jinghpaw pati 3 hte rau Jinghpaw hkristan nawku hpung ni rai nga ai Jinghpaw Wunpawng Hkalup Hpung Ginjaw (KBC) kawn sara ni, Hkatawlik (RC) kawn jau ni, Anglican kawn Bishop hte Shanglawt Hkristan kawn sara ni sa du nhtawm pati pawng na matu shadut mat wa ai lam chye lu ai.

Raitim Dr. Manam Tu Ja woi awn ai Jinghpaw Mungdaw Demokaresi Pati (Kachin State Democracy Party - KSDP) gaw shanhte a matu ten grai ni kahtep mat nna pawng hpawm na rai n jin lu ai majaw Jinghpaw Mungshawa Nsen Shapraw Komiti gaw pati 2 rai nga ai Jinghpaw Amyu Sha Demokaresi Rapdaw (KNCD) pati hte Jinghpaw Demokaretik Pati (KDP) ni sha myit hkrum ai re majaw dai pati ni hpe jawm madi shadaw la na matu Jinghpaw mungdaw shawa masha ni hpe mung tsun shadut ndau shabra mat na nga tsun ai.

Wunpawng Mungdan Shanglawt Hpung (KIO) Tingnyang Up Malai (2) dingsa Dr. Manam Tu Ja woi awn ai KSDP gaw lai wa sai February shata Myitkyina ginwang Shata Pru kaw hkrum shaga ai aten ‘Jinghpaw pati ni pawng hpawm lam hpe masa hku hkap la da sai raitim du na 2015 ra lata poi ngut ai hpang daw she bai myit yu sa na re lam’ pati pawng hpawm lam bawngban hpawng hta tsun mat wa ai.

Jinghpaw pati langai sha byin na lam hpe dai pati 2 kawn matut nna kahkyin gumdin lam hpe galaw sa mat wa na re lam chye lu ai. Jinghpaw mungshawa a akyu a matu pawng hpawm lam galaw nga ai Jinghpaw Mungshawa Nsen Shapraw Komiti gaw pawng hpawm lam hpe hkap la da ai pati hpe du na 2015 ning ra lata poi hta Hpakan ginrawng hta sha n ga laga Jinghpawng ginra ni hta mung madi shadaw me jaw la na matu zinlum mat na re nga Jinghpaw Wunpawng Hkalup Hpung Ginjaw (KBC) kawn hpung sara langai rai nga ai komiti ningbaw Sr. Lamawng La Tawng tsun ai.

Asuya USDP hkanghkyi pati a shingnan Unity and Democracy Party-Kachin State (UDPKS) hte Lisu Amyu Sha Rawtjat Pati (LNDN) hpe mungshawa nsen shapraw dap kawn n saw shaga ai lam pawng hpawm lam komiti kawn tsun ai. Dai bawngban hpawng de pati ningbaw ni, pati dat kasa ni shanglawm nna yawng marai 60 hkawt sa du bawngban mat ai lam chye lu ai.


0 comments:

Post a Comment