Asuya MPC hpe garum ai lam EU jahkring sana

MPC rung shawng e

European Union, EU kaw nna Myen asuya a MPC, simsa lam gawgap dap hpe gumhpraw garum nga ai lam ndai shata March 31 hta asak htum sai hte, jahkring sana re lam ‘EU’ maigan matut mahkai hte shimlam ningbaw Federica Mogherini a tsun shaga ahkang lu ‘Maja Kocijancic’ tsun ai.


“EU kaw nna MPC hpe tara shang garum ai myit hkrum ga sadi gaw ya asak htum wa sai re majaw March 31 hta jahkring kau sana re”

MPC hpe 2012 hta Myen gumsan magam Slg. Thein Sein ahkang jaw ai hte Munghpawm Hkringmang Slg. Awng Min woi awn ai hte gaw de hpang wa ai re.

Simsa lam jahkrup bungli ni hta jai lang ai gumhpraw law malawng hpe EU garum nga ai rai nna, ya ten du hkra Euro wan 8.7 (USD 9.8 million) MPC hpe garum jaw sai lam, EU a lai wa sai ndau hta mu lu ai.

EU hku nna MPC hpe garum ai lam dawm kau ai raitim, du wa na asuya ningnan hte jahkrup nna matut garum mat wa na re lam tsun ai.

Bai nna asuya ningnan hta MPC hpe NLD ningbaw Slg.jan Aung San Su Kyi nan yu reng mat wa na re lam NLD dinggrin salang, Slg. Win Hting tsun ai.

Posted in: