KIO hku nna Sara Maran Ja Gun makoi mayang lamang galaw

Mar1, 2016 Rev. Dr. Maran Ja Gun makoi mayang lamang, Padang Gawknu, laiza

Amyusha ningbaw Rev. Dr. Maran Ja Gun a moimang hkumtsawp hpe Myitkyina de n la wa shi yang, dai hpawt daw Wunpawng Mungdan Shanglawt Hpung KIO Ginjaw Laiza e, makoi mayang akyu hpyi hpawng galaw sai re.

Ndai lamang hpe KIO Ninggawn Daju Pati Komiti lit la nna Padang Gawknu e galaw ai rai nga ai.

2011 ning shanglawt majan ningdaw kalang bai byin wa ai hte, Sara Kaba gaw Nawngnang Jinghpaw Wunpawng Chyum Dakkasu (KTC&S) e hpaji up galaw nga let, dai kaw na pru hkring sa nhtawm, amyusha shanglawt bungli hta shi asak htum hkra tsap sai re.

J.W amyusha ni mungmasa dip da hkrum ai kaw nna lawt lu na lam hta, Sara Kaba Ja Gun gaw KIO ginjaw hpe aten shagu hpaji jaw wa sai re.

Jit Dwi (Sai Dwi) ana hpe aten galu hkam sha nga let, February 29, Bat Langai Ya jahpawt hkying 1:30 daram hta Sara Kaba Maran Ja Gun, asak 70 gaw shi shanu nga ai Laiza dum nta e n nga mat wa ai re.

Jinghpaw Wunpawng Hkalup Hpung Ginjaw (KBC) labau hta, Sara kaba Maran Ja Gun gaw Karai magam aten hpring galaw nga ai kaw nna dai hpe jahkring nhtawm amyusha mungmasa shanglawt magam bungli hpe gun hpai wa ai re.

Dai hpawt Laiza e makoi mayang lamang ngut ai hpang Sara Kaba a moimang hpe Myitkyina de la wa na re. Hpawt ni shawa makoi mayang poi lamang hpe, Nawngnang KTC&S jawngwang AD 2000 Gawknu e galaw let Jaw Bum Jinghpaw Wunpawng Hkristan Lupding Lupra e makoi mayang na re.

Posted in: