KIA dapba 6 ginra e Myen hte Sam gasat poi byin

burma army ni kachin front line

Wunpawng Mungdan Shanglawt Hpyendap KIA Dapba 6 ginra asuya dapnu 99 hte Sam hpyen lapran mani hkying hkum 5 daram gasat poi byin wa sai re.

Sam hpyen-dingdung SSPP/SSA dapba 1 n-gun 200 ram hte asuya dapnu 99 hpyen hpung n-gun 200 jan gaw jahpawt daw hkying 10 kaw nna shani ga ang hkying 3 ram du hkra gasat hkat ai hpang Sam dap ni gaw hting nut mat nna Myen dap ni ngam nga ai lam KIA ba 6 du kaba langai Jinghpaw Shiga Dap KNG de tsun ai.

Gasat hkat ai shara gaw KIA ba 6 Mungbaw sinna hkran Man Nawng Ya lai Hka Ra makau re. De a shawng shani Man Nawng Ya hta KIA dung 37 hpe Myen ni hkan shachyut gap lai wa sai re.

KIA ba 6 ginra hta hpyen shamu shamawt taw ai NCA simsa lam sen htu sai Sam hpyen-dingda RCSS/SSA hte, simsa lam sen n htu shi ai SSPP/SSA Sam dap ni gaw SSA dazik hte sha nga hkawm ai majaw ginhka na matu yak ai lam KIA ni tsun ai.

Ya ten Sam dap ni gaw KIA hpyen hpung ni a hpang hkan nang nga ai rai nna Sam dap a hpang asuya dap mung dingyang hkan nang nga ai lam, lahta na KIA ba 6 du kaba wa lai wa sai lahkawng ya e Jinghpaw Shiga Dap KNG de tsun wa sai.

Ndai zawn rai KIA a hpang lagyim hkan nang ai lam ni gaw Myen mung kata amyusha rawt malan hpung nkau NCA ga sadi sen htu ngut ai hpang pru wa ai sat lawat rai nga ai.

Maning October 15 NCA mungdan ting gap hkat jahkring ga sadi sen htu ngut ai hpang November shata kaw nna Sam mung dingda na Sam hpyen RCSS hte Balawng TNLA ni lapran majan laja lana byin nga dingyang re.

Ya na zawn rawt malan hpung shada gap hkat nga ten, KIA Dapba 6 hpe Munggu ginra hta hpaw jat ai lam ni a majaw mung, Myen asuya gaw tinang hpyen n-gun 3,000 jan hpe Lahta Sam mung de htu tawn sai re.

Ni re ai ten, Myen asuya gaw NCA hpe mungmasa hpyen masa laknak langai hku jai lang nna rawt malan hpung ni hpe sai garan nga ai lam, NCA sen n htu ai Amyusha Hpyen Masa Mung Masa Daphpawng UNFC tsun tawn ai re.

Ndai bat March 26-28 laman, Miwa ga jarit mayan amyusha rawt malan wuhpung 7 a Wa mung Pang Hkam zuphpawng hta RCSS hte TNLA rawt malan wuhpung shada byin ai majan lawan jahkring na lajin tawn ai. Lama na maga ga hku nna manghkang matut shabyin rai yang amyusha rawt malan hpung ni rau jawm pat hkum sa wa na re lam sadi jaw dat sai.

Posted in: