Laksan Mungdan gaw de na Htai J.W sha ni ndau

Mar 2, 2016 Jinghpaw mung masa bawngbav sanglang hpawng, Chiang Mai, Htai mungdan

Jinghpaw Wunpawng Mungdan hte amyusha ni yawng gaw, awmdawm shanglawt lu ai mung masa lam gaw de sa na ra sharawng ai lam, Htai mung Jinghpaw Wunpawng amyusha ni March pra 3 nhtoi hte ndau shabra dat ai.

Jinghpaw Wunpawng Amyusha Hpung (KNO-Thailand) woi awn ai hte mana de March praw 2 ya shana, Chiang Mai mare e galaw ai ya na Myen mung a mung masa salang bawngban hpawng hta ndai ndau shapraw ai re.

J.W amyusha ni hku nna ya yang na Myen asuya woi awn galaw ai mung masa lam yan ni hta n ginchya lawm na matu mung, ndau hta sadi jaw tawn ai.

Bai nna, awmdawm shanglawt ai mungdan lu na ngu ai ‘Mungdan tara kanu’ hpe galaw nna J.W sha ni yawng hpe asan sha chye na matu shabra nhtawm J.W amyusha hte seng ai mung masa wuhpung wuhpawng ni yawng dai gawda ai tara hpe hkrak tup hkan sa na matu lajin tawn ai re.

Matut nna awngdawm shanglawt lu na masing, mung masa lam yan kata, J.W laknak lang wuhpung yawng, mung masa wuhpung yawng, mungchying mung shawa yawng hte amyu bawsang yawng mung n-gun gahkyin ra na lam tsun shadut tawn ai.

Zuphpawng hta 1975 ning e sat hkrum ai Jinghpaw Wunpawng Mungdan Shawnglawt Hpung (KIO) hpe woi gaw de ai GOC Lahtaw Zaw Seng a prat na hpyenla ding sa ni, nawku hpung woi ni hte KNO ningbaw ni shanglawm nna shana yuptung du hkra bawngban wa ai re.

1961 kaw nna 1975 du hkra KIO a mung masa gaw ‘Awmdawm Shanglawt’ lam yan re. Raitim dai hpang ya ten du hkra, KIO tsap ai mung masa gaw jet ai federal munghpawm kata madu uphkang ahkaw ahkang lu ai mungdaw a matu rai nga ai.

Federal mung masa gabaw hta, KIO gaw March 30 ya hta lung wa na Slg.jan Aung San Su Kyi woi awn ai, Amyusha Democracy Ginjaw Pati (NLD) asuya n’nan hte mung masa shaga na hkyen nga ai ten, ndai ndau pru wa ai rai nga ai.

Posted in: