Gumsan magam kadai rai na?

ningrau gumsan magam marai 3 a sumla

March 11 daini galaw ai Naypyitaw Hlutaw zuphpawng e mungshawa yawng myit mada nga ai shawng ningnan lang na Myen mungdan a mungshawa gumsan magam kadai rai wa na ngu ai hpe ya dan dan leng leng mu nga sai re.


Slg.jan Su kyi kam hpa ai jawng lung manang langai mung rai nga ai, NLD tang shawn ai Slg.Htin Kyaw gaw daini Pyithu Hluttaw ningtau gumsan magam shingjawng ai hta ya asuya ningtau gumsan magam rai nga ai Dr. Sai Mauk Kham hpe me 274/29 hte tawk hprut dang mat sai re hte Pyithu Hluttaw malai tara shang ningtau gumsan magam masat hkrum sai re.

Bai nna NLD tang shawn ai Amyutha Hluttaw a malai ningtau gumsan magam shara shingjawng ai Hkang amyusha Slg. Henry Ba Hti Yu gaw ya na USDP asuya pati na Slg. Khin Aung Myint hpe madi shadaw me 148/13 hte dang nna Lahta Rapdaw a ningtau gumsan magam masat hkrum sai.

Bai nna, Myen Hpyendap maga na ningtau gumsan magam hpe ya yang Yangung Tai Hkringmang Daju Slg. Myint Swe hpe lata san ai lam Myen hpyendap manaw Myawady shiga hta ndau sai re. Shi gaw shawng de hpyendap asuya chyawm tari Du Kaba Than Shwe a shangun ma langai mung rai nga ai.

Lata da hkrum ai ningtau gumsan magam masum hta gumsan magam kadai byin na ngu hpe tara shang rapdaw hta lata ai lam n nga shi tim, mung shawa law malawng gaw Slg.jan Su Kyi a kam hpa ai jawng lung manang Slg. Htin Kyaw sha sawn da ai re.

Gumsan magam lata ai lamang hpe ndai March shata 15, bat hpang lahkawng ya shani galaw na re lam chye lu ai.

2008 gawda ai tara kanu 59 (Sa) hta pat hkum ai majaw 2015 ra lata poi dang NLD pati ningbaw Slg.jan Aung San Su Kyi hku nna gumsan magam n mai byin tim, de a ntsa hta nga na re lam hpe shiga media ni hpe adan aleng tsun wa sai re.

Raitim, NLD pati a CEC dinggrin salang langai rai nga ai Slg. Win Myint gaw Su Kyi gumsan magam byin nan byin wa na re lam lai wa sai shata hta shiga dap ni hpe tsun ai.      

Posted in: