 |
| L.N.D.p ndau |
Ndau laika hta manghkang mabyin kadun hte ndau ai ginlam daw lahkawng lawm nna, daw langai ginlam 1 hte 2 hta KIA gaw dai ning kaw nna Lisu amyusha ni hpe rim zingri sat nat ai lam ni galaw nga ai lam ka da ai re.
Sadung, Kambaiti ginra KIA dap ni a masa lam ni seng nna Wunpawng Mungdan Shanglawt Hpung KIO ginjaw Lat Du Up Jum Nhpang Naw Bu ya na zawn tsun ai.
“Shanhte shapraw da ai laika hta yawng jaw ai ngu ngai langai mi mung n mu ai. Dai masha sat ai law, zingri ai law nga ai gaw anhte n re. Anhte pyi naw kadai galaw ai ngu hpe sagawn taw ai re. Shanhte gaw dai hpe sakse hte hkrak rai galaw ai lam mung n nga ai. Hpyen wa tsun ai hku sha rai na re ngu shapraw dat ai rai na re. Tsun ga nga yang, dai Ngwa Le kaw byin mat wa ai masha sat ai gaw kadai galaw ai re pyi n chye ai. De majaw anhte hpe mara shagun ai ngu ai shanhte maga mara mu ai sha re. Anhte gaw n hkap la ai.”
Bai nna KIO kawn galaw nga ai kani nanghpam pat jasan masing hte seng nna mung Du kaba Naw Bu ya na zawn matut tsun ai.
“Anhte gaw shanhte hpe kani n hkai na alang lang tsun sadi jaw sai. Hpaji ni mung jaw sai. Dai kaw n hkan nang ai nga yang gaw rim ai lam ni gaw galaw ai. Rim ai nga tim zingri na sat na matu n re. Ningmu jahpaw ya na, hpaji jaw rai na bai dat dat ai re.”
Ndai ndau hte seng nna Lisu National Development Party (L.N.D.P) ningbaw Slg. Shwe Min Jinghpaw Shiga Dap KNG de ya na zawn tsun ai.
“KIA ngu gaw Kachin Independence Army re. Kachin hpe gawng malai ai re. Raitim ya gaw KIA hpyen hpung nkau mi gaw galaw taw nga ai. Yawng hpe gaw n tsun mayu ai. Marai langai ngai ndai hpe galaw shut ai nga yang KIA galaw ai ngu sha lachyum pru ai. Dai re majaw anhte mung masha ni gaw ndai hpe myusha lam gasat ai lam re ngu hkam sha mu mada taw nga ai. Kaja nan mung dai hku byin taw nga ai majaw ndau laika shapraw da tai lam re.”
Lisu amyusha ni mung kaga Jinghpaw, Lashi, Maru, Zaiwa, Rawang ni zawn sha Jinghpaw Wunpawng amyu lakung hta na langai rai nga ai.
0 comments:
Post a Comment